世界第一「飛人」- Yves Rossy

文：MenClub 魏文青　　圖：互聯網
POSTED ON 16 Dec 2014

做一隻冇腳嘅雀仔喺天空上面飛，相信係好多男人嘅夢想，所以好多男士都對於做飛機師有一定遐想(當然都好有可能係對空姐有遐想)。但正如你揸住架車飛到一百幾十公里你唔會話係自己跑得好快；同樣地你揸架飛機喺天到飛嚴格上都唔係你飛。要講到真正有飛嘅感覺，甚至喺上次介紹過嘅「WingSuit」之上嘅，就要數到Yvess Rossy呢位世界第一飛人！

話佢係飛人，因為Rossy自製咗一個用碳纖製造、闊2.4米、裝有四個噴射引擎的飛行背包。同WingSuit等透過增加表面面積而提高升力，從而增力滑翔距離的方法唔同，Rossy的飛行背包基本上就將自己改造成為一架飛機本身。而且個背包真係一對翼同四個引擎，除咗油門之外並無任何轉向裝置，而係利用身體的扭動來控制飛行方向。

你又唔好睇佢成件事好似好兒戲，呢個背包乃係Rossy過去15年來的心血精華。原本是一個瑞士機師的Rossy，喺十五年前接觸過自由落體之後，深深愛上喺空中自由自在的感覺。可惜自由落體只容許單方向(即係向下) 飛行，Rossy覺得唔夠過癮，於是就開始利用自己的專業知識打造飛行背包。 2008年成功飛越阿爾卑斯山脈、2009年試圖橫越直布羅陀海峽(最窄處為14.3km)，可惜因為強風失控，最後逼降在距離終點西班牙海岸3KM的海面、2009年即成功橫越英倫海峽(最窄處為34KM)，你都唔好話佢唔勁。

如果你想感受下喺個天到飛有幾好玩，我就強烈建議你睇再下面呢兩條片：一條係Rossy最新，去到杜拜拍嘅；另一條就係Top Gear UK嘅片段－一個飛人同架拉力車賽跑啫，冇咩嘢嘅！