日本女仔喜歡打扮，唔同季節都要有唔同穿搭，絕對唔可以因為夏天天氣熱，就求求其其著件背心短褲就算數，一定要襯吓襪仔呀、紗裙呀、頭巾呀等等。但男仔就唔同，好多時都怕熱怕麻煩，一到夏天，有幾薄著幾薄，愈簡單方便就愈好。但唔可以因為懶就忽略細節，因為女仔就係注重小地方的麻煩友。

最近日本網站就公佈女生票選「男生的夏季NG穿著」。結果女生最無法接受嘅第一名，係好多男事都會睇漏眼的部位……

10位　好似底衫一樣的白色T-Shirt

著白色T-Shirt係冇問題，但如果太薄太透，又或者毫無款式可言，同底衫冇咩分別，畀人感覺就好似街坊Look，太隨便。

9位　赤裸胸膛配粗曠飾品

雖然舞台上成日見啲男歌手會做呢種打扮（特別係韓國），但如果只係出街，咁樣著未免太Over，令人覺得呢條友做乜L野。

7位（並列）　T-Shirt領口露出胸毛／背心袖口岔出腋毛

其實男人有毛真係冇咩所謂，不過有啲女仔真係好變態，覺得腋毛、胸毛就代表嘔心，千祈唔好畀佢見到。

6位　短袖西裝

大部分西裝都係長袖款，有啲女仔覺得，一旦變成短袖款，就有啲不倫不類，甚至有啲似過氣大叔嘅感覺。

3位（並列）　動漫T-Shirt／牛郎風浴衣／領口鬆垮的T-Shirt

動漫T-Shirt真係要睇係咩公仔，如果係Minion都幾正，不過如果係大波蘿莉公仔，就真係頂唔乸順。

至於牛郎風浴衣，睇返之前日本女生唔喜歡的男性衣著，牛郎風並唔係日本妹嘅菜。

領口鬆垮的T-Shirt應該一年四季都冇人接受到，殘殘舊舊咁邋遢，女仔點會鍾意。

2位　合身上衣裡凸出肚子

夏天就係要Show身材的季節，如果你肚仔凸凸，女仔當然在意。

1位　裇衫透出乳頭

喂！呢樣嘢勁多人中喎！好多男仔都覺得夏天咁熱，咪鬼打底，但其實裇衫真係好易透Lin，而透Lin真係好核突！