十二個世界盃有趣紀錄！（下）

文：MenClub 胡說　　圖：互聯網
POSTED ON 09 Jul 2014

新紀錄號外：準決賽輸最大比數 2014年巴西世界盃

無錯，今日淩晨，巴西喺準決賽中被德國狂炒7：1，刷新咗準決賽輸得最大比數紀錄。如果尋晚有放手一博，去馬會買波膽10蚊客其他，應該都有1250蚊落袋。

7.最高入場人數紀錄：邊一場係最多球迷入場嘅賽事，原來係半個世紀有多的1950年巴西世界盃，當時嘅馬拉簡拿球場，入場人數竟達173,850。再睇今年巴西世界盃，馬拉簡拿球場改建後只能容納76,935人，少咗足足一半！都好嘅，坐得舒服啲，安全啲。
8.最高收視嘅世界盃：唔計上網睇、或者裝泰星，2010年南非世界盃係歷來最多人次睇嘅一屆：總共有320億人次，以當時全球69億人口計算，每人睇過4.6場比賽。
9.最強龍門：今屆十六強美國對比利時嗰場，美國守門員侯活（Tim Howard）真威水：成功攔截咗比利時15次射門！美國雖然最後輸2：1，不過輸得光榮，因為佢地唔使「搬龍門」都救到咁多球。
10.最高年齡入球球員：上次講過最年輕入球嘅球員係比利，咁年紀最大又係邊個？答案就係：喀麥隆嘅米拿（Roger Milla）！佢喺1994年美國世界盃對俄羅斯嘅分組賽，射入喀麥隆唯一嘅入球。佢當時已42歲，喺一眾世界盃球員來講，點止係「叔叔」，直情係「伯伯」。
11.踢得最多場嘅國家：巴西贏得最多世界盃（五屆），但論參賽場次計，以德國最巴閉！由1930年起至今，佢地已踢咗100場，而第100場就係德國對葡萄牙嗰場（踢得多唔代表你贏硬嘅，呢個世界上有「燈神lulu」㗎嘛！）
12.開支最大的世界盃：世界盃咁多場波，要使嘅錢自然勁多。今年巴西世界盃係歷年最貴嘅一屆，一共用咗160億美元，足足等於過去5屆世界盃開支嘅總和。唔信？睇下個表就知（以美元計） 1994 美國世界盃：3000萬 1998 法國世界盃：3億4千萬 2002 日韓世界盃：50億 2006 德國世界盃：60億 2010 南非世界盃：40億合計：153億7千萬