問10個男人，可能有近半數夢想有個做護士或醫生嘅女友或老婆。原因，可能因為套白色/粉紅色制服，又可能因為睇得日系AV太多。其實，同女護士或女醫生確實有不少優點，也有不少缺點，亦唔係話心口得個勇字就可以，你要先review一吓閣下是心理及生理狀態。

筆者經常因公務出入公立、私家醫院，據我觀察及個人經驗，近四、五年政府及私家醫院湧現不少樣貌標緻可人的年輕女護及女醫生。好現實亦好膚淺咁講，男人對一個女人有冇好感，以至fantasy，好多時係先睇樣，覺得對方貌美可愛又賢淑，自然想追求。與女性醫護人員拍拖，好處在於對方多數較同齡女性成熟、爽快、堅強，識諗嘢轉數快。如果你已厭倦部份港式女士弱不禁風、鍊住把聲扮可愛，無主見又愛話事，想轉轉口味，擁有一個傾到心事嘅「兄弟」，同時又當你係兒童病房小朋友咁照顧嘅姐姐/妹妹做女友，請留意以下8點。

作息要好～～大多數年輕的醫護人員都需要輪班工作，部份參與行政或培訓的高級護士或護士長，會有較穩定的工作時間，例如早上7點至下午5點。建議你的工作時間最好與對方相近，甚至一模一樣。你可能話：「大哥，我做sales㗎，我做marketing㗎，夜夜都冇得走，講呢啲！」咁真係唔好意思嘞，大多數醫護人員都看重作息時間，例如第朝番06或07，邊可能等到你夜晚11點先開始撐枱腳。

高EQ～～承上文所講，醫護人員需長時間工作，有時需要突然OT，無端端要你乾等或在約會過程返回工作崗位。如果你EQ低，玩黑面，發脾四，一定唔襟玩。係真正男人，係有心想食「天鵝肉」，唔該攞少少胸襟出嚟，體諒另一半嘅工作。

好紀律～～紀律要好，看似抽象，以下所講的紀律，最基本係你屋企，你部車，乃至你隻狗嘅狗屋都要整齊。另外，財政上的紀律也相當重要，欠三、四張卡數，又財仔，個個月唔夠洗，遲早露晒底，不少收入相對穩定的年輕女性醫護人員，並非外界所想必要釣件金龜婿，反而想搵個理財謹慎，可依靠的另一半。建議你先執靚或有計劃重整自己財政狀況。

乾淨企理～～好肯定，大多數女性醫護人員的另一半都乾淨企理。如果你習慣不修邊幅，請你立即改。鼻毛、指甲定時修剪，牙齒要潔白，口腔要冇口氣（刷牙記得刷埋條脷）。勿挖鼻，勿咬手指，唔好用把口當指甲鉗，洗面記得洗乾淨耳殼內外、頸紋有冇老泥？眼角有冇眼屎啊？牙縫有冇食剩嘅菜葉或黑胡椒碎？個鼻有冇黑頭？鼻毛之間有冇剩低鼻屎未抹淨？上次用磨沙膏洗面係幾時？兩年前？定係中學謝師宴嗰陣啊？有冇汗味？夏天有冇噴止汗劑？啲衫有冇霉味？冬天有冇搽潤唇膏？乾燥天氣有冇搽cream先？著裇衫有冇熨？有冇放定兩包Tempo喺袋？有冇袋定濕紙巾畀護士仔女友先？呢啲喺大男人看似唔重要，甚至你根本冇留意過嘅生活衛生小節，往往就成為佢同唔同你開始的決定關鍵

鍛鍊身體～～要追護士或醫生做女友/老婆，真係要keep好身體。因為佢哋就係健康嘅專家，往往不自覺職業病發作，將你看成case（病人）一樣。閣下作為追求者，最好實實在在展示你有健康生活習慣同體格。我覺得，有約45%的女性醫護人員頗熱衷性事，因為sex某程度上係能夠釋放壓力，類似情況也見於需長時間高壓力工作的行業。如果大家有共識，有sex life，最好就keep到自己有更佳體力與耐力。

一位任職物流經理的男性朋友，偶然在醫院認識了做護士的女友，他坦言，一開始大家就很熱衷sex，而女友對sex的需索亦好強烈，這位朋友表示慶幸自己平日有鍛鍊體能才得以招架。我覺得他相貌平平，但他形象幾健康，平日亦經常「操山」，他們拍拖年半就拉埋天窗。

老實無敵～～長期在醫療界工作，見盡光怪陸離人性醜惡生生死死，大多數醫生護士都對辨別真話假話有一手。簡單講，如果你經常講大話，又習慣一個大話冚另一大話，咁你要想想自己應否放棄追求，抑或繼續做你的「大話王」。另外，除非你追求的對象有宗教信仰，又或一直活在父母專制管教之下，否則，大多數男性或女性的醫護人員，普遍對非主流、古怪的想法與行徑有較高接受能力。舉個例，你想同佢喺屋企扮「護士與病人」，又或「主人與女僕」，以至有更激嘅idea，老實放膽講出嚟。即使對方拒絕亦不會永遠放在心上。

勿亂炫富〜〜很多收入豐厚，家境不俗的男士，在追求女醫生或女護士初期，刻意炫富，展示經濟實力，試圖給予女方更大信心。當然，你找到個一心想嫁富家公子的，我衷心祝福你白頭到老。但要明白，許多護士與醫生，都有遠大理想同抱負，亦幾討厭玩世不恭滿身銅臭的炫富族。況且，醫院能接觸的人面其實好廣，尤其是私院的病人家屬。所謂天外有天，山外有山，你自以為有很多個零，大把追求者多過你。

信守承諾～～醫護人員的時間管理技巧普遍較一般人好，行事風格也講求良好schedule，講過就要落實執行。舉個例，大家決定今晚到某餐廳晚饍，男方不應突然在黃昏時段更改地點；說好秋天去京都看紅葉，月底前要訂好機票，你就一定要做妥。否則，對方會覺得你不信守承諾，缺乏安全感。點解信守承諾咁影響評分，好簡單，醫院工作每每充滿突變與挑戰，總希望私生活平平穩穩，想好要做的事能如期發生，你做得到，就畀到佢安全感。