{ SKIP }
文:MenClub Mean娜  圖:MenClub
POSTED ON 13 Apr 2015

如果你住香港區,咁今次介紹嘅青衣美食城就未必啱你。當然,你話你有車,世伯伯母開油站,成日身痕周圍兜,搜刮邊區有好嘢食就另計。

星期一,本來最無mood諗吓去邊度玩。Mean娜都幾反對呢種消極派,梗係最down嗰日plan定星期五去邊度食嘢去邊度玩啦,唔通到星期五下午先WhatsApp人哋去街,口窒窒又冇噱頭冇idea咩。

Happy Friday,梗要玩到夜一夜先返歸。平時同朋友去旺角、大角咀食宵夜,係呀,啲舖頭開得好夜,但唔集中。食得串燒又食唔到糖水,要食糖水又要行到街尾,鬼咁麻煩,幾個路口,截的士又唔係,行就更加無理由。

轉吓新場囉,要喪飲喪食,想懷愐讀書年代「掃街樂」,唔一定去MK或SSP,青衣都可以,仲係24小時營業!




「青衣多美食」,呢句話只會係葵青荃灣深井人先會明白。區外人對青衣食肆的印象,好可能仲停留喺90年代初,被稱為「屋邨無牌熟食小販天堂」的年代。

90年代初,青衣長發商場對出空地,一直係無牌熟食小販的領域,全盛時期共有三、四十檔小販聚集,甚至延伸至各屋邨,規模之大,在香港一時無倆,電視台固然有採訪,聞說當年的房屋署長都「微服出巡」坐住AM車落區視察。由於小販「阻街」,衛生欠佳,食物環境衛生署多次掃蕩,無牌熟食小販逐漸被打擊,最終捲蓆收皮。

N年前那塊空地,現已變成全港少有的通宵美食城。




24小時營業的小食區域,在香港非常罕有
食宵夜,最忌交通唔方便。好彩青衣美食城交通都尚算便利,一對出已經係巴士總站,入嚟又方便,出去亦有通宵巴士。



N241正正係到旺角的通宵巴士,食完宵夜,大可乘搭N241到旺角,再搵車返屋企。
唔想到旺角轉車咁麻煩,巴士總站旁邊,都有的士站,隨時可以同班朋友Share搭。


即使半夜三更,美食城依然人山人海,好多人特此到來搵食。Mean娜聽幾位老闆同老闆娘講,話唔少喺機場嘅打工仔,番放工時間比較顛倒,而好多公司車都會途經青衣,做得咁辛苦,落咗車梗要嚟醫肚。


青衣美食城的好處,不單止24小時營業咁簡單,食物仲好多選擇。

有涼茶舖,捱夜食宵夜前,最啱飲返碗,清熱氣,打定底。



有串燒檔,除了雞翼腸仔呢啲大路食物,仲有燒蠔、燒菠蘿、燒羊架,選擇都算多。



由於全部即叫即燒,所以需要耐心等候
亦有兩餸飯、燒味等等飽肚選擇。


牛雜、魚蛋等等地道小食,一定要有,唔係點算「掃街」。


有碗仔翅、生菜魚肉等等,連日式章魚小丸子都有。



煎釀三寶算是港人最愛之一,Mean娜試過兩次半夜幫襯過,都啱啱遇著「出爐」,熱辣辣,好正。



煎炸小食,亦有滷水蛋、滷水雞翼、滷水雞脾等等。


出面少見的上海包點以及各式點心。


唔喜歡咁重口味,可以清清地,食粥都得。


美食城連接長發商場


一入長發商場,見到OK便利店,自問未夠皮,要吔埋雪糕先心息都得,再唔係買啲啤酒同friend番歸再啤,正呀!



要去廁所?冇問題,沿住OK便利店,繼續向前行到盡頭,就有洗手間,清潔程度都可以接受。





成個美食城咁大,有咩好介紹先?等Mean娜話你知啦!

首先,喺美食城買食物,除了涼茶舖,其他都要在售票處落Order買飛,再到舖頭領取食物。



Mean娜大力推薦串燒店!一來出面較少見,二來「串宵」一店的食物質素確係唔錯。




每日都有「是日推介」,例必有幾樣食物特價,決定之前要望清楚。
「串宵」用紙落Order,放眼望去,的確好多選擇。前面提過,因為即叫即燒,所以要等好耐。唔想等咁耐,可以預早1小時打電話去,落Order,1小時後再去拎,慳好多時間。


特別推介的有雞全翼(分蜜糖及孜然口味)


雞軟骨


少有的燒菠蘿,又香又多汁,Mean娜大愛!


燒韮菜也十分入味


燒魷魚亦是少見之選,味道都唔錯。


另外燒蠔都是大熱,而有兩種配料可以選擇,Mean娜便要了蒜蓉右芝士。


串燒店對面的台式食品店「8度半」,也是Mean娜的熱門推介。


同樣地,食物都是即叫即作,新鮮滾熱辣。


最近「8度半」推出了煎餃子,試了一下,外皮香脆,餡料好味,都幾好食。


識食「8度半」,一定會叫炸薯條。這裡的炸薯條出奇地香脆,而且可以加辣粉或紫菜,香口惹味,不過採訪當天,「8度半」換了另一種粗身薯條,口感比原來的幼身薯條欠佳。



揸車嚟,記住︰

1.長發商場設有停車場,揸車人士入來食宵夜,其實好方便就腳,九龍入嚟行三號幹線,近荔景沿左落荃灣路,靠左上青衣北橋,落橋迴旋處睇指示。

2.提提你,有泊車優惠:逢星期一至日,早上10時至晚上9時半(以入車時間計算),憑商場發票1張或不多於街市發票3張,購物消費滿$200或以上,即可享有1小時免費泊車優惠。


對於香港人黎講,打邊爐素來都係不分季節嘅美食,即便係過去疫情期間大家出唔到街,但都可能會買急凍料返屋企食餐好嘅。好似本地網店ChumPlus就曾經於疫情推出急凍牛雜鍋,更大賣超過十萬份。近日佢哋更進駐觀塘巧得 ...
gourmet
【火鍋】疫情期間賣出十萬份 觀塘青藤椒牛雜鍋
21 Jun 2023
近日外國傳媒爆出,以「Salt Bae」之名走紅嘅土耳其籍廚師Nusret Gke,近年身陷多宗與前員工之間嘅官司,當中嘅罪名包括佢「剋扣貼士」、性別歧視、於餐廳內不公對待員工等。令佢原本就唔太好嘅名聲進一步受挫。 ...
gourmet
【美食】剋貼士、性別歧視「Salt Bae」被前員工連環控告
27 Apr 2023