{ SKIP }
文:MenClub Mean娜  圖:MenClub
POSTED ON 02 Mar 2015

成日話女人愛狗如命,男人一樣會,經常開口埋口叫自己做「老豆」,又叫狗狗做阿仔,去到放狗嘅公園,係咁同人話自己同狗狗肝膽相照,一齊練跑一齊操山,講到出生入死,又話自己上次失戀,狗狗feel到自己好sad撲埋嚟hug hug主人,幾乎好過女朋友。

其實,男人都有寂寞,苦無傾訴對象嘅時候,有狗作伴就最好不過,咁好嘅朋友,應該同佢去多啲見識吓,狗night club或狗「鴨店」就唔建議你帶佢去,狗嘅茶記不妨一試。


呢間「寵物茶餐廳」有咩咁特別?點解會被不少狗主稱為「狗記」?


「寵物茶餐廳」其實係樓上舖,行上一條長樓梯就會見到轉角處架著一個大大嘅發光招牌。

推門入去,掛滿可愛鮮豔嘅擺設,仿草皮牆身、Hello Kitty公仔、毛茸茸沙發,要幾Q有幾Q,仲以為係「麥記」生日會



「颼~」突然,Mean娜嘅白滑長腿突然被輕掃一下,邊個咁可惡輕薄本小姐?!低頭一望,一隻可愛到核爆嘅毛孩搖頭擺尾汪汪叫。

「汪汪汪汪汪!」毛孩一直向我汪汪叫,可惜Mean娜聽唔明汪星人嘅語言,唔知佢講咩,幸好攝影師同狗狗屬同一種族(狗公des ka?),為我翻譯,原來毛孩向我們道出「歡迎光臨。」

「寵物茶餐廳」係一間可以帶寵物入內,一齊又食又玩嘅茶餐廳。如果你冇養寵物都唔怕寂寞,因為餐廳內仲有兩隻可愛嘅駐場小狗「香香」(貴婦狗)同埋「TT」(芝娃娃)陪你玩。

正當Mean娜打算翻開Menu叫碟碟頭飯同香香、TT一同食嘢呃Like,發覺呢個Menu非同小可!奶油多、乾炒牛河、熱奶茶乜乜乜都冇,但就有迷你泡芙、蛋糕、法式花球、壽司等等……十分Fusion!不過全部都唔係人食嘅,而係畀狗狗食嘅。

不同於一般貓貓Cafe或者狗狗Cafe,「寵物茶餐廳」主要唔係Serve人,而係Serve你嘅小毛孩。熱愛狗狗嘅老闆娘Jay解釋︰「我本身有養狗,以前試過買啲狗食品,放咗年幾都冇變壞,就知佢落好重防腐劑。所以我決定自己親自整天然嘅狗食品畀班狗仔。」至於主人上到嚟食咩?你可以選擇食自己又或者叫外賣,狗奴才你都有今日喇~

你睇香香望住TT食嘢個樣幾可愛~


仲可以同駐場小狗玩,抱住佢哋餵吓嘢食。


其實Jay喺設計狗狗菜單時,都問過營養師意見,以營養均衡為大前提,例如三文魚薯蓉泡芙、龍利魚柳蛋糕、肉汁蘿蔔法式花球等等,有姿勢都有實際。
呢個就係餐廳近日新推出嘅貓貓蛋糕。


咦?貓貓蛋糕都有?乜呢度唔係For狗仔咋咩?

叫得「寵物茶餐廳」,其實任何小動物都歡迎,貓貓狗狗同埋女生不可以吃的兔兔都帶得上嚟。

更威威的是,「寵物茶餐廳」設有全港首個寵物用波波池,裡面仲有鞦韆同呠呠車,主人可以放毛孩入裡面玩耍,幫寶貝兒影輯靚靚寫真。(不過你叫隻狗仔做BB啫,佢唔會真係好似人類BB咁識得自己玩,波波池主要用途都係畀主人——你,自High一番)


入到餐廳,主人仲唔需要擔心衛生問題,因為Jay會定時清潔餐廳,又會每晚做足清潔、消毒。就算狗狗於餐廳內隨心大小二便一樣冇又怕,「以狗為本」嘅Jay會立刻衝去清理案發現場,主人毋須尷尬,最緊要主人同毛孩玩得開開心心。






如果心血來潮想Shopping的話,餐廳內仲有好多寵物日用品、零食同埋衣服,你可以抱住毛孩一齊又揀又試,溫馨方便又快捷,仲可以滿足主人嘅購物欲。






不過餐廳地方有限,只能容納16個人及16隻狗,所以嚟之前最好預約,並講聲所帶嘅寵物係邊種小動物,以免發生「貓狗大戰」。


地址︰荃灣眾安街93號1樓
電話︰26488999
營業時間︰星期一至日12︰00 - 22︰00
價錢︰套餐分$60、$120及$168,客人可自選食物
網址︰https://www.facebook.com/PetsRestaurant
由Denis Villeneuve執導嘅史詩科幻大片《Dune: Part Two(沙丘瀚戰:第二章)》叫好又叫座,截止目前全球累計票房高達5.79億美元,於各大影評網站獲得高度好評,就連名導史提芬史匹堡亦給予高度肯定,大讚《Dune 2》 ...
hobby
【影視】史提芬史匹堡大讚《沙丘瀚戰2》:我看過最精彩的科幻電影之一
28 Mar 2024
因為「掌摑事件」而沉寂咗一排嘅Will Smith,今年夏天將聯同老拍檔Martin Lawrence再次回歸大銀幕,繼續搞笑互相鬥嘴。 經典動作喜劇《Bad Boys(重案夢幻組)》最新續集《Bad Boys: Ride or Die(重案 ...
hobby
【影視】Will Smith沉寂兩年回歸!《Bad Boys 4 重案夢幻重組再重組》公開首部預告
28 Mar 2024