各位觀眾，歡迎收睇由外國Youtuber「ScrewAttack!」舉辦嘅「空想決鬥 悟空對Superman 第二回合」！「ScrewAttack!」一向都以將唔同作品嘅動漫人物、超級英雄捉對對決，再以角色設定、強弱之處分出勝負。事實上早喺2013年佢哋就試過分析「悟空對Superman」呢個對決，當時變身成為「超4」嘅悟空(當時《神與神》未上映)同Superman打到地球都爆埋，最後因為超人能夠喺外太空生存而勝利。

全片長約20分鐘，前七分鐘係背景交代、由12分鐘開始就係賽後分析、兼且解說最終結果。如果你唔想睇片，文青喺下面就幫你做咗個小總結！

「ScrewAttack!」嘅理據，一句到尾就係「悟空有涯，而Superman無涯。以有涯隨無涯，殆矣」。根據佢哋嘅分析，因為好重要，所以我講多 次，係「佢哋嘅分析」，悟空多年黎之所以能夠戰勝一個個敵人，係因為佢每次都能夠憑努力衝破自己嘅界限；但Superman喺設定上就係一個「冇界限」嘅 存在。

「ScrewAttack」舉出幾個例子。第一，係超人曾經試過喺距離地球25.04光年(即約236兆公里)嘅纖女一(天琴座中最光嘅星)附近，聽到地球發生危難，然後再用短時間返到地球。即使假設佢用咗十分鐘，佢嘅時速都要係光速嘅一百萬倍。

第二個例子係超人曾經抬起過由「永恆(Eternity)」組成嘅神「Spectre」、又曾經拎起過一本有「無限」頁兼且承載住多個宇宙嘅書，雖然兩次有人幫，但基於「無限除2=無限」，超人嘅力量都係無限！