相信科學，可能唔會認同「有咁耐風流，就有咁耐折墮」，不過，經濟有周期，有增長，亦會衰退，總冇可能成日咁好景。據彭博引述寶馬集團董事局，掌管勞斯萊斯（Rolls Royce）嘅高層Peter Schwarzenbauer喺德國柏林表示，勞斯萊斯喺中國巿場正受寒風吹襲，廠方正調整生產量，以應對回落中嘅中國巿場銷情，佢預測銷量最多會下跌15%（會唔會樂觀咗啲？）

近年打貪反腐雷厲風行，強國豪客購買豪華汽車時都比以前審慎得多。Peter Schwarzenbauer認為：「錢就喺度嘞，但啲人唔想揸住部勞斯萊斯周圍走show off。」嘩！乜突然睇得咁化啊，唔曬命？點似我地霸氣沖天，窮得只有錢嘅強國老兄啊！其實，受影響嘅唔單止係勞斯萊斯呢類頂級豪華汽車品牌，連奧迪呢類強國新紮中產同年青有米族都勁like嘅汽車品牌一樣中招，六月份銷情終於出現兩年多以來首次下跌。不過，寶馬7系仍然一支獨秀，繼續有雙位數字升幅。

勞斯萊斯旗艦車系Phantom，今年首季銷情下跌13%至781部，去年適逢新型號加入，全年賣出4063部，升幅達12%。