聲大大有電賣　Nokia聲音充電

文：MenClub Patrick　　圖：互聯網
POSTED ON 18 Aug 2014

香港人多車多，四圍都嘈嘈閉，確實幾令人煩厭。不過噪音有時都可以造福世人，尤其係近日Nokia同一班英國倫敦大學科學家成功研發，利用聲音去為手機充電的技術，將來大家部手機冇電、又冇帶「尿袋」的話，靠把聲就能夠令部機着番，話唔定第時搭車反而希望有班嘈喧巴閉的師奶阿叔幫你叉電。

聲音充電的原理，係喺手機入面安裝多個納米發電機（Nanogenerator），透過入面氧化鋅納米線產生的壓電效應，將空氣中的音波轉化成電子，繼而供電畀手機。目前班科學家已成功用呢種技術生產到5V電壓，即係有一般外置電咁高，真係夠為手機叉電；而所需的聲浪大細，大約係街邊的環境聲，或者收音機播歌、普通人講嘢咁上下已經足夠，唔使大家嗌破喉嚨咁叉電。

講就講到好神，但現時呢種技術仍在實驗階段，肯定有排先會畀大家用到。況且Nokia都已經俾Microsoft收購咗，萬一Nokia攞咗呢個專利，聲音充電技術會唔會喺手機層面上有發展都成問題，係Apple或者Samsung研發出嚟就話啫！講開新充電科技，最近美國化學學會都發表咗將汗水轉變成電力的技術，用一細塊貼紙去收集汗水，再透過特殊物質，將汗水入面的乳酸分解出電子。不過目前一塊貼紙只產生到4uW電量，連幫電子表叉電都唔夠，莫講話手機，而且點樣將貼紙入面的電力轉移去電子產品都仲需要研究，一定比聲音充電更遲面世。