上網已經唔單止係生活嘅一部份，甚至可以話係身體嘅一部份。我哋無時無刻都依賴網絡，上網慢少少都想掉左部手機，但如果同你講部手機冇得上網只係得聽電話，你會有咩反應。你可能會話︰「我唔好買返nokia？仲可以擋子彈添呀！」不過來自紐約嘅藝術家兼設計師Joe Hollier就咁講︰「市面上嘅app同埋穿戴裝置，聲稱可以幫我哋搵返本來嘅生活，但我覺得毫無幫助，根本係講大話。」所以Joe Hollier就決定生產只有通話功能嘅手機The Light Phone，幫大家拎返平時花喺花手機嘅時間。

The Light Phone得4mm厚，只係八達通咁大部，全白色機身加簡單嘅單色屏幕，感覺成部無印計數機咁。手機可以插SIM卡，更加可以支持專用app方便你將智能手機飛線到The Light Phone。由於The Light Phone除咗打出打入之外就冇其他功能，所以就有20日嘅超長備用時間。咁到底要幾錢先可以用到打電話功能呢？只要你拎USD$100出嚟，等到出年6月就有得用。