好多人對連環鬧鐘有免疫力，接morning call又識得扮精神然後繼續瞓，如果你自己或者身邊朋友都係懶瞓豬，咁不如試試呢款會自動釋放氣味嘅鬧鐘SensorWake。呢個咁得意嘅發明係出自美國工程系學生Guillaume Rolland嘅設計，佢嘅發明曾經喺舊年Google Science Fair入選15強，依家去kickstarter集資生產大受歡迎，預計今年11月就可以推出市面。

SensorWake目前有咖啡、牛角包同埋蜜桃等12隻味道，鬧鐘會根據你預設好嘅時間放出氣味，陣陣早餐飄香包你醒神。如果你呢幾款都唔啱口味嘅話，原來仲收埋咗一隻美金味道，相信冇人會嫌錢腥嗱掛，如果將來有得自訂氣味就更正過癮。產品說明話每隻氣味大約可以keep到兩個月，如果趁early bird優惠價USD $65入手，仲可以揀兩隻氣味添。