早幾年Panasonic已經話過會推出8K電視機，仲話會同NHK合作希望可以喺東京奧運時推出。家陣距離奧運仲有5年時間，所以Panasonic都決定快馬加鞭，日前就宣布會喺2020年推出8K相機，影片解像度會比目前全高清嘅高16倍。新機未知會唔會以新產品線推出，事關8K片1格就有3300萬像素，原有嘅M4/3感光元件似乎唔夠撐，而Panasonic只表示新機將會用最新研發嘅第10代LSI晶片，有關詳細嘅影像規格就未有任何消息。

目前一條1分鐘嘅4K片，就算壓縮咗都要成300Mb，非常大食。除此之外，普遍認為4K已經人類肉眼嘅極限，就算升到8K都未必睇得出分別，咁到底整8K出嚟有咩好處呢？正如前文提到Panasonic急於為東京奧運做準備，而8K影片一格就可以變成3300萬像素嘅相片，所以對攝影師捕捉運動就可以大派用場，到時就連連拍都可以慳返。