老老竇竇，智能手錶其實都係電子錶，電子錶龍頭Casio見班後輩玩得咁開心，點會少咗佢老人家一份，所以Casio終於宣布決定玩埋一份，將會喺出年3月推出自家智能手錶，招牌G-Shock係時候出擊啦！

繼Swatch宣布推出智能手錶之後，已有40年生產電子錶經驗嘅Casio，近日都決定順應潮流，將會喺出年3月推出智能手錶，手錶將會定位為入門向，以舒適度同埋耐久度為中心發展，建議售價會係400美元左右。CEO樫尾和宏表示佢哋喺4年前已經開始設計智能手錶原型，希望智能手錶嘅銷售額可以達到100億日圓。

雖然Casio冇公布手錶嘅資料，但講到耐久度，大家都會諗起出名襟用嘅G-Shock系列。G-Shock系由伊部菊雄設計，自1983年面世至今，全世界已經賣出超過7,000萬隻。G-Shock除咗耐用之餘，仲有好多特別功能，好似有防水、防撞、防塵同防寒等，可以抵禦10米跌撞，又可潛入200米水深。手錶內置功能亦非常豐富，系列早早就試過喺手錶加入遊戲、心跳脈搏感應、溫度計、UV計同埋GPS等功能，所以要推出智能手錶，對Casio嚟講應該係輕而易舉。

1980年。將計數機功能結合到電子手錶。

1982年。呢款手錶當年已有齊日文、英文、德文、法文同西班牙文字典功能。

2000年。早喺2000年已經推出全球首隻可以影相嘅手錶。

2000年。同年仲推出埋全球首款可以播mp3嘅手錶