尋日經mean娜推介完就咗去睇《玩轉腦朋友》，上網買2D版連手續費埋單$98，真心覺得貴到冇朋友，唔怪得話睇少場戲可以買樓啦。更重要係一條友入場睇戲，毒L指數已經起碼已經係LV 7。如果大家上加快上車又唔想一支公睇戲，不如自己整套私人影院喺屋企，唔使$200就得，抵玩。

相信大家都之前都有見過用紙皮DIY嘅家庭影院，而最近竟然有人參考過網友嘅設計之後加以改良，仲喺日本嘅kickstarter網站makuake集資推出，重新設計之後冇晒毒味，成件無印產品咁小清新，難怪推出一陣已經超額完成，就連全部early bird都被搶晒。

SOLO Theater係用紙皮同魔術貼造，而每個細節都經過改良，好似紙皮箱內部就油成黑色，而且組裝嘅罅隙都唔會透光，令你可以更有影院feel。SOLO Theater用咗兩層設計方便你調整距離，就算用大屏幕嘅平板都唔怕太近睇到鬥雞。除此之外，仲有唔同size嘅卡紙框比你放好手機同平板，目前支援iPhone5/5S、iPhone6、iPad Air同iPad mini。用完之後可以摺返埋，夠晒慳位。

成個SOLO Theater我覺得最正就係有埋呢排紙牌觀眾，等你覺得you will never walk alone。

大熱天時笠住睇片一定熱到喊。

講返《玩轉腦朋友》係幾好睇嘅，我睇完之後勁鍾意呀愁，仲即時去埋買公仔添，如果mean娜唔劇透比我知，套戲應該會更加好囉，hihi。

SOLO Theater@makuake