美國有機構研究發現，家陣人類已經聰明到內置自動導航，進化到識得邊行邊玩手機都唔會發生意外，真係達爾文都表示震驚！

好多國家都有宣傳話邊行邊玩手機好容易發生道路意外，但美國嘅Public Library of Science最近就做咗一項研究，發現呢班人原來會喺潛意識調整自己嘅行動模式，每步都會行得特別小心，可以避免發生交通意外。

今次研究就召集咗30名測試者，年輕由18-50歲，測試時將佢哋分成三組，其中一組測試者要一邊行一邊用手機打字，同時就要喺預設嘅路線上面繞過障礙物。結果發現低頭族行路時會下意識縮短步伐同埋步距，會延長雙腳踩住地面嘅時間，而且仲會對路線上嘅阻礙物提高警覺，不過就要更長時間先可以行到目的地。

其實唔使做實驗大家都應該知到結果，平時喺街上都見到唔少人玩手機嘅人都會識得行下停行，有時仲會突然加速或者「轉線」，事關用緊手機嘅人視野會變差，但只要有阻礙物進入周邊視力範力，就會預先調整自己嘅腳步同埋移動路徑以避開意外。