近年美少女戰士又再掀起一股熱潮，Peach John 內衣、各式文具、千幾銀一碌嘅權枚、耳筒、變身器粉盒諸如此類Kick嚦卡嘞出到一街都係。自此之後我就聽到好多男仔久唔久就牙痛咁聲，話女朋友又屈佢送啲咩咩美少女精品，又貴又唔實用都唔知要黎做乜(我心諗，咁你啲Figure唔通又好實用？)！

但以下介紹呢個美少女電話，你就一定要買比女友，仲一定要逼佢用添！

點解呢？第一，佢好平。部機半身賣12,600Yen，即係港紙八舊水鬆啲，就算加埋個裝飾組合，整抽嘢都只不過係千一銀！即係5份1部iPhone 6，仲唔抵到爛？

第三，佢功能好！佢除咗一個1.8吋顯示屏之外，3G/4G上網、WiFi、影相、藍芽、紅外線、聽歌、睇片連玩SMS都通通做唔到！唔好講最長通話時間得2小時，我寫咗咁耐都仲未搵到究竟邊到有掣比我打電話！換言之只要你女友換咗呢部電話，佢就正式成為叫天不應叫地不聞但又自我感覺良好嘅小港女！唔好講佢想煩你，佢想求救都未必得！嘩，六根清靜喎，淨係呢個功能都夠值錢啦！

事不宜遲，即刻入返部啦！

http://p-bandai.jp/kiwamonoweb/kiwamono-chara/sailormoon/heart/#haertplan