第10位：英格倫　《機動警察》(得票:50)

出自《機動警察》的機械人，隸屬警視廳警備部特科車二課。型號為AV-98，全名為「Indeteminate Ground Armed Mobile」。高8.02米，全裝下重6.62噸。裝甲由纖維強化金屬與碳纖強化塑膠所造，主要武器為左輪手槍。

並列第8位：(得票:51)

柯柏文 《變型金剛》

來自外星Cybertron嘅博派首領，在各個版本嘅故事中帶領Autobots對抗由Megatron帶領嘅Decepticons。可以變身為一台大型拖頭。為人勇敢、正義、有責任感。

超獸機神斷空我　《超獸機神》

https://www.youtube.com/watch?v=pyKwECs9djQ

由鷹戰機(藤原忍駕駛)、豹戰機(結城沙羅駕駛)、象戰機(司馬亮駕駛)同獅戰機(式部雅人駕駛)合體而成。1985年首播時未受重視，原定52話嘅故事亦縮短為38話。但結束之後反而受動畫迷追捧，結果推出三部OVA。近年則「活躍」於各個版本嘅《機戰》之上－－起碼文青就第一次見斷空我就係喺機戰系列。

第7位：RX78-2 《機動戰士高達》(得票：56)

《高達》嘅開端，有白色惡魔之稱，地球聯邦軍「V計劃」下的產物。由阿寶駕駛，於一年戰爭中跟隨白色基地由太空打到落地球、由北美打到南美再打返上太空，最後協助聯邦打敗自護公國。如果以歷代高達計算，戰力非常有限，但以重要性計，就絕對獨一無二。

第6位：六神合體　《六神合體》(得票：65)

由橫山光輝漫畫《Mars》大幅改篇嘅動畫。故事中的「六神合體(GodMars)」係由主角明神武嘅生父於明神武仲係嬰兒時，在吉森星製造再連同主角送到地球。除咗主角機基因(GAIA，平時藏於日本明神礁)，其餘五部機人頭獸(Sphinx)、天神(Uranus)、巨人神(Titan)、真神(Sin)同地神(Ra)平時均藏於地球不同位置。當感應到明神武有危險，基因就會由明神礁跳出，並將明神武傳至駕駛艙。如果遇上基因都對付唔黎嘅對手，就會召喚出其餘五隻合體成為身高50米，體重1050噸嘅「GodMars」。

第5位：地隱俠　《魔動王》

由遙大地駕駛，代表火與大地嘅魔王，亦係整部作品唯一識講嘢嘅魔動神。由大地使用魔動槍將魔動襟章射向地面畫出魔法陣再召喚出，但必須喺平坦廣大嘅表面上召喚。戰鬥力方面除咗各級魔動力，仲有絕招「大地神劍」。於動畫第26集開始進化為超級地隱俠

第4位：零式高達W 《新機動戰記GUNDAM W 無盡的華爾茲》

請注意，係OVA版。雖然我覺得原裝版識變型係威武啲，同時OVA版對羽毛翼又未免太中二，但無可否認嘅係佢真係完完打中當年真係讀緊中二嘅文青的心－－大哥，作為一部高達有對識甩毛嘅羽毛翼，你點唔鍾意佢呀？

第3位：GaoGaiGar 《勇者王》

Sunrise勇者系列第八部，亦係最後一部作品，但一改前作低齡向嘅設定，風格內容都大有不同。除咗故事比較複雜(老實講，當年文青其實唔係好睇得明)，機設方面亦仔細得多。我覺得最有特色嘅就係佢嘅武器設計，唔係螺絲批就槌仔，幾Man先得架！講咁多做咩呀！唱返首歌先啦！

第2位：Evangelion 《EVA》

都係嗰句Evangelion就係一部「半生物半機械又半神一方面有如吸塵機一樣要拖住條電線周圍行，但另一方面又會好似阿媽咁突然之間暴走嘅奇妙巨型兵器。」但文青大膽講句，大家其實唔係鍾意呢部機械人，而係鍾意佢整個故事，部機只係其中一個代表物啫(應該係)！

第1位：龍神丸　《超魔神英雄傳》

「係機會啦飛雲！」、「絕招！登龍劍！！！！」

龍神丸嚴格上唔係一部機械人，因為翻查機設，發現原來佢係由七龍神中其中四個嘅頭蓋骨、五粒寶玉、再加各龍神嘅筋骨纖維組合而成。所以嚴格上更加似係一隻科學怪人(?)另外龍神丸亦係少數有自己意識但又載人嘅機械人，就連《魔動王》中地隱俠識講嘢嘅設定，據說都係來自龍神丸。