而家識囡囡，真係唔駛再靠朋友，下下Friend搭Friend，約到幾時丫？一個電話，Shake一Shake，就可以Shake到囡囡，想幾時搭訕都得。好多時主動出撃的，都係男士，但好多時先被收皮的，都係男士。皆因好多女仔都會睇住個勢做人，見呢條友仔一講錯嘢，就即時Black List佢。最慘就係，好多男士原來都唔識與女生的溝通技巧，成日講錯嘢，結果囡又識唔到，掃自己興。

而家就一齊檢視，交友App搭訕有咩禁忌啦！

1.太快問電話號碼

好多男仔成功勾搭到女生後，傾幾句就問人要電話/Whatsapp（一樣啫）。

基本上，女生係唔會咁快畀電話號碼你，一來，你啲「好少上Wechat」又或者「想傾電話多啲」嘅藉口，大把人用過，邊有咁易上當。二來，同你唔係好熟，就問人要電話，正常女生都會受驚，怕透露資料畀你呢個陌生人，所以會拒絕。

老老實實，如果對方真係對你有戒心，畀咗電話你，一樣都會唔理你。所以建議大家，彼此了解了一段日子，先好問對方拎電話，成件事會更舒服。

2.不認識但扮認識

嗰啲咩「好耐冇見～」、「你係咪邊個邊個？」又或者「你好似我個Friend」做開場白，真係老L土囉！如果畀個女仔識穿咗，只會覺得你個人好爛，加上似你識嘅朋友又如何？唔會特別開心架喎。

所以男生們，開場白索性直接啲，唔好作埋啲低級兼容易識穿的大話。

3. 太多問句

好多男仔啱啱認識對方時，為了搵話題，都會不停拋出問句，例如「你係學生定做緊嘢？」，當對方答完之後，就不停沒完沒了追問細節。假設當對方答自己係學生，男生就再追問：「中學生定大學生？」、「邊科？」、「忙唔忙？」等等，其實一直畀人問，真係好煩，家下唔係做問卷調查，下下咁問人，問到對方都煩，好難唔理你。

男生試下問完問題後，講下自己嘅事，又投其所好講吓對方可能感興趣的事，大家先可以相互了解，増加彼此話題。

4.暴露不良動機

男生最忌就係暴露出不良動機。好多時女仔都會試探呢個男生，係好人定壞人，係咪淨係想「呃蝦條」，為了證實，女生會問男生「願不願意上床？」、「想不想當炮友」之類，但多數都唔係真係咁下流，更多時候，只係出於試探。

萬一被對方試探出，你只會頓時成為佢心目中的狗公，以後唔需要再講嘢。