要知道一個人有幾當紅，最簡單，在Google輸入人名，若然頭幾位已顯示出你想找的人，那麼，他/她絕對是實至名歸的大紅人。我輸入「王」字，王宗堯的名字已在搜尋器中的聯想字詞中名列前矛，（搜尋時間為4月5日），與同樣姓王，名維基的，穩坐一、二位。

問王宗堯（Gregory Wong）可知「自己有幾紅？」他笑而不語，我爽快問：「可否直呼你做男神？」他說︰「無所謂，我最近都改咗名，叫“Namson”」風趣、幽默、淡定、不卑不亢，男人，應該就係咁。

時勢造就？
如果無HKTV，無接拍《選戰》、《導火新聞線》，香港人對王宗堯的印象可能好模糊，甚至「唔認識都可能好合理」。實情是，他有相當豐富的演出經驗，內地、台灣的電影、電視劇都有他份。《喜愛夜蒲》似是初登台階的演出，其實非也。

數碼年代，造就更多的演出平台，有本事就可瞬間爆紅。實實在在的，傳統電視已經不能夠滿足大眾的娛樂需要，王宗堯對此有保留，「我覺得現時香港人睇電視的模式仍很落後，還是依賴大氣電波，扭開電視就可以收看，雖然大家都有手機在手，但是數據流量限制了用途。若果HKTV的節目可以從家中的電視盒子中下載，可分享結特定用戶，情形如Apple ID般，傳入自己的手機或iPad之中，無須受流量限制的話，相信會有更加多人睇。」

別說如果
沒有免費頻道，其實還有很多生存方法，但如果，只是如果，若非HKTV未能爭取免費電視牌照，而讓大家話咁易今晚不「回家」，襟個掣轉睇男神，王宗堯有否想過現在可能紅多十倍？「不可以這樣想，若然整天這樣想的話，做人永遠不會開心。」。

回想HKTV開台初期，氣勢如虹，但後來的發展急轉直下，全台上下無不曾失落沮喪。

王宗堯還記得前年十月，與多位藝人到過政總遊行，各人到金鐘一間酒樓食飯，他形容那一餐是「解穢酒」。當時，各人的衣服都貼有HKTV logo貼紙，碰巧酒樓的電視播著《鏗鏘集》，正在報道HKTV的發牌事件，不少藝人的成了這新聞節目的「苦主」。當時姜文杰突然將那貼紙貼到電視畫面的右上角，這個簡單動作，說出了同事們心中所想。

「塞翁失馬 焉知非福」

HKTV的重點劇《選戰》、《導火新聞線》，令王宗堯變成男神。在兩套劇集之中，王宗堯都飾演近似壞男人的角色，近代的香港電視史話畀大家聽，演得好的壞人，往往比完美無瑕的好人更出位。俗語「男人越壞 女人越愛」，咁即係Women want him and men want to be him啦！

Single and Available
貴為網民心目中的男神，又散發出「壞壞地」的感覺，喂喂喂，女人緣應該不會差吧！

男神與DaDa分手後，感情生活似乎靜止了，單刀直入，男神是否單身？「我現在無伴侶。」

這個答案可圈可點，他續道︰「經常都會想認識一些人，或試試拍拖，但現時大個了，不似過往說拍拖就拍拖，現時真的想要認識耐一點，看清楚一點。」

天秤座男神
三十幾歲仔，想成家立室也是常識吧，尤其是男神是天秤座，這類男人最需要有人陪伴在側，無論睇戲食飯，都想有人陪，他說：「一個人吃飯只是醫肚，不叫食飯。」

OK，明白了！

言下之意，即是想要有伴的，但只是未找到合適對象，收到！請提供多少少條件，等有意者做足準備，例如，愛圈內還是圈外人？「圈內同圈外人都無所謂，但我知道前者是會緊張一點，因為你生活在五光十色、多姿多彩的世界之下，後者則會明白很多事都是工作需要。」

環繞地球一周後……

看過男神履歷，知道他曾經在內地及台灣工作，他對兩岸三地的女人有何見解？

他曾經與一位香港女演員討論過同樣問題，男神認同傳統香港女人，例如王媽媽那一代香港女性的觀點︰
「內地女生識得呃呃氹氹，好識得照顧你，令你覺得好被呵護，又識得嗲你，成件事呃到你肯俾錢；台灣女生唔呃你，對人亦嬌嗲，令你好開心，有拍拖和戀愛的感覺。不過，當你有事，佢唔可會同你一齊捱，唯獨香港女人，無論你有咩事，就算你有任何差錯『瀨嘢』，又或者勾三搭四，然後鬧到你癲，鬧到任何一個男人都覺無晒尊嚴，最後都願意留低陪你捱嘅，只會係香港女人。」

環繞地球一周後，原來讚緊香港女人

睇過不少女性討論區，香港女士經常投訴港男人不夠「Man」。

男神在此，醒幾招畀巴打升呢upgrade，ok？

「我覺得唔會唔夠Man呀，現時香港的男人注意打扮，又做gym又跑步，我覺得男人被人投訴嘅唔係唔夠Man，而係好Man嘅時候會被人投訴唔夠溫柔；當粗枝大葉嘅時候，又被人話唔夠細心；當好Man去做運動又畀人嫌有汗味；掛住打機時又畀人話『宅』；當讀書好叻，有書卷味，又畀人彈佢悶，咁實有事可以挑剔喎！」

「講真，只不過係嗰個人可唔可以畀到你想要嘅嘢。」

「當然啦，個男人有樓、有車、又時間陪你、事業有成、孝順、仲孝順埋你阿爸阿媽、又帶佢哋去旅行兼買埋樓俾佢哋住、又識得多人，生個仔出嚟可以按排好校網，做女人嘅完全無須擔心，只需要同朋友high tea，或者去歐洲旅行買個手袋啦，咁係唔係咁樣妳個人生就豐富、美滿咗呢？好似白雪公主咁嘅生活有幾開心呢？咁我唔知啦！」

「我覺得最緊要搵到一個了解自已，氹到自己開心，生活可以兩個一齊捱都無憂，嗰種香港精神就最好。」

男神這番話，你可能嫌說教，你亦可能恨不得即刻喺fb share，小編身邊的已婚男攝影師就聽到定晒型，好似眼有淚光。

最後，男神提到與前輩的一席話︰「個男人喺出面捱得幾辛苦都好，個女人鬧住，但永遠都可以擺兩碟餸係枱面，有碗飯兩個人一齊食，一齊捱，咁我覺得嗰個女人就好正啦！」

所謂男神，都係人，都想有細水長流的愛情。

Hair:Zap @QUEEN'S PRIVATE i SALON

Make-up:Aster Pang

Special thanks︰Hooray Bar & Restaurant（2895 0885）